ઉનાળો મને વ્હાલો લાગે છે ...

કોયલ જયારે મોર્નિંગ એલાર્મ બનીને આવે છે ,
ઉનાળો મને વ્હાલો લાગે છે  ...
જયારે આમ્રવૃક્ષ મંજરીઓથી કોળી ઉઠે છે ,
ઉનાળો મને વ્હાલો લાગે છે  ...
 મરવાનું કાચું અથાણું પીરસાય ભાણે ,
 ઉનાળો મને વ્હાલો લાગે છે  ...
 મોળી છાશનું માખણ મુખે જામે છે ,
ઉનાળો મને વ્હાલો લાગે છે  ...
પેલી કેસર- હાફૂસ રસ્તા પર બેસી જાય છે ,
ઉનાળો મને વ્હાલો લાગે છે  ...
બરફ ગોળા પર રંગબેરંગી શરબત રંગોળી  પૂરે ,
ત્યારે ઉનાળો મને વ્હાલો લાગે છે  ....
આઈસ્ક્રીમ કુલ્ફી ને જીભેથી ચાટીને
બચપણની નાદાની કરી હસી પડું ,
ત્યારે ઉનાળો મને વ્હાલો લાગે છે  ...
રાત્રે અગાસીમાં તારા ,ચંદ્ર અને સમીર ,
ગોઠડી માંડીને હસતા હોય ,
ત્યારે મને ઉનાળો વ્હાલો લાગે છે   ..
મોસાળની યાદો , અભ્યાસ મુક્તિનો આનંદ ,
ઝીણા ઝીણા મલમલના પહેરણના મોંઘા ભાવે
મને ઉનાળો વ્હાલો લાગે છે   ...
લીમડાની છાંય અને ભેંસથી ભરેલા તળાવના દેખાવે
મને ઉનાળો વ્હાલો લાગે   ...
દિવસે તપેલી કેડી પર તડકો અને ધરતી
હાથમાં હાથ પરોવી ચાલે
ત્યારે ઉનાળો મને બહુ વ્હાલો લાગે છે  ....