હર પળ તારો ઇન્તઝાર કરશે .......

ચલ ચલ જલ્દી ચલ 

ચલ ચલ જલ્દી ચલ ,

આજે આપણે અહીંથી ઉડી જઈએ ક્યાંક

દૂર દૂર આકાશ બોલાવે છે મને ,

પેલી પહાડીની ટોચ પર થોડો શ્વેત બરફ વિખેરાયેલો છે ,

આજે બરફનું ઘર બનાવીએ ,

રેતીનું ઘર તો રહી ગયું નદીને કાંઠે ,

કેટલાય પગ એની પર ચાલીને જતા રહ્યા ,

અહીં આ બરફનું ઘર છે ...

થીજેલી હવાઓમાં એ થીજેલું રહેશે ,

એમાંમેં નાનકડું દ્વાર મુક્યું છે ...

એને ખોલીને અંદર જજે ,

ત્યાં પેલો રૂમાલ મુકેલો છે ,

જેના પર મેં લાલ દોરાથી તારું નામ ભરેલું છે ....

તને ગમે તો લઇ લેજે ,

એ મારી નિશાની છે ....

એ ફક્ત તારી માટે જ છે ,

કેમકે કોઈ પાસે આ ઘરનું સરનામું નથી ,

આ ઘર અને સરનામું

જે હર પળ તારો ઇન્તઝાર કરશે .......